झापा । झापामा प्रहरीले निर्वाचन सुरक्षाका लागि‘कार्यदलको टोली’ खटाउने तयारी गरेको छ । हेभीवेटको चुनावी भिडन्त भएको झापालाई अहिले सबैभन्दा बढी सुरक्षा संवेदनशील जिल्लाको रूपमा लिइएकाले प्रहरीको विशेष कार्यदलको टोली खटाउन लागिएको हो ।
प्रहरीको कार्यदल विशेष तालिम प्राप्त र हातहतियारले सुसज्जित हुन्छन् । कार्यदलको टोली अन्य प्रहरीको तुलनामा निकै बलियो मानिन्छ । कमान्डोलगायत विशेष तालिम प्राप्त कार्यदलको टोली हतियारले अन्य प्रहरीभन्दा बलियो मानिन्छ ।
झापामा मनोनयन दर्ता लगत्तै झापामा उपत्यकाबाट थप जनशक्ति पठाइसकिएको नेपाल प्रहरीका केन्द्रीय प्रवक्ता तथा डीआईजी अबिनारायण काफ्लेले बताए । झापामा नयाँ र पुराना दलबीच मुठभेड हुनसक्ने चिन्ता रहेको प्रहरीको रिपोर्ट छ । मनोनयन दर्ताकै क्रममा पनि यहाँ धक्कामुक्की भएको थियो ।
राष्ट्रिय स्वतन्त्र पार्टी (रास्वपा)को प्रभाव र यही सन्दर्भमा काठमाडौं महानरपालिकाका मेयर बालेन्द्र शाह (बालेन)ले उम्मेदवारी दिएपछि सुरक्षा चुनौती बढेको हो । झापा–५ बाट एमालेका अध्यक्ष केपी शर्मा ओली र बालेन शाह आमनेसामने भएका छन् ।
