झापा / काठमाडौँको नागढुंगामा ट्राफिक प्रहरीका निरिक्षकले जवानलाई कुटेको घटना छानबिन गर्न समिति गठन गरिएको छ ।
बुधवार नागढुंगास्थित सडकमा प्रहरी निरिक्षक जितेन्द्र साहले जवान मदनराज खड्कालाई कुटेका हुन् । घटनाबारे छानबिन गर्न प्रहरी उपरिक्षक पदम बहादुर विष्टको नेतृत्वमा समिति गठन गरिएको उपत्यका प्रहरी कार्यालयका प्रवक्ता (एसएसपी) शेखर खनालले जानकारी दिए । उपत्यका प्रहरी कार्यालयले गठन गरेको समितिमा उपत्यका ट्राफिक प्रहरी कार्यालयका प्रहरी नायव उपरिक्षक र जिल्ला प्रहरी परिसर काठमाडौका निरिक्षक सदस्य छन् ।
ट्राफिक प्रहरी प्रभाग नागढुंगामा कार्यरत साह र प्रहरी प्रभाग नागढुंगामा कार्यरत खड्कालाई जिम्मेवारीबाट हटाइएको छ । साहलाई उपत्यका ट्राफिक प्रहरी कार्यालयमा र खड्कालाई जिल्ला प्रहरी परिसरमा झिकाइएको एसएसपी खनालले जानकारी दिए ।
