झापा / नेपाल प्रहरीकाे साइबर ब्यूरोले झापाका २० वर्षीय सन्तोष चिमरिया र १९ वर्षीय विकास पौडेललाई पक्राउ गरेकाे छ।
नेपालका विभिन्न सरकारी तथा गैरसरकारी निकायका सूचना प्रणालीमा अनधिकृत पहुँच पुर्याई डाटा चोरी गरेको आरोपमा दुई जनालाई पक्राउ गरेको हाे ।
उनीहरूले सीएमडी नेपाल र नेपाली फर नेपाल (एनएफएन) जस्ता समूह खडा गरी विभिन्न सामाजिक सञ्जालमार्फत वेबसाइट ह्याक र डाटा ब्रिचको दाबी गर्दै आएका थिए।
नेपाल मेडिकल काउन्सिल, राष्ट्रिय परिचयपत्र तथा पञ्जीकरण विभाग र निर्वाचन आयोग जस्ता संवेदनशील निकायका सर्भरमा अनधिकृत प्रवेश गरेको निवेदनका आधारमा ब्यूरोले प्राविधिक अनुसन्धान सुरु गरेको थियो। सोही क्रममा मङ्सिर २८ गते मेचीनगर नगरपालिका–९ का चिमरिया र पुस १८ गते दमक नगरपालिका–९ का पौडेललाई पक्राउ गरिएको हो।
उनीहरूको साथबाट ४ थान ल्यापटप, ११ थान मोबाइल, हार्ड ड्राइभ र रिपिटर लगायतका उपकरण बरामद गरिएको छ। पक्राउ परेका दुवैमाथि विद्युतीय कारोबार ऐन, २०६३ अन्तर्गतको कसूरमा थप अनुसन्धान भइरहेको साइबर ब्यूरोका प्रवक्ता प्रहरी उपरीक्षक दीपकराज अवस्थीले जानकारी दिएका छन्।
