साङ्केतिक तस्विर
झापा । स्कुटी दुर्घटनामा एकजनाको मृत्यु भएको छ भने अर्का घाइते भएका छन् । मृत्यु हुनेमा स्कुटीमा पछाडी सवार धादिङ थाक्रे गाउँपालिका ११ स्थायी घर भई हाल कमल ६ बस्ने ३० वर्षीय राजन तामाङ रहेकाे जिल्ला प्रहरी कार्यालय झापाले जनाएकाे छ ।
प्रहरीले दिएकाे विवरण अनुसार झापाको कमल गाउँपालिकामा भएको हिजो साँझ ६ः४० बजे कमल गाउँपालिका २ छलफल चोकस्थित भित्री सडकखण्डमा केर्खाबाट समयगढतर्फ जाँदै गरेको मे.११ प.१६१८ नम्बरको स्कुटी आफै अनियन्त्रित भई दुर्घटना भएको थियो । दुर्घटनामा स्कुटी चालक इलाम माई नगरपालिका १ स्थायी ठेगाना भई हाल दमक ५ बस्ने २९ वर्षीय राजन महत घाइते भएका थिए । टाउको र बायाँ कानमा चोट लागेका गम्भीर घाइते महतलाई निम्स अस्पताल दमकमा सामान्य उपचारपश्चात् थप उपचारको लागि बीएण्डसी अस्पताल बिर्तामोड रेफर गरिएको थियो ।
सोही स्कुटीमा पछाडी सवार धादिङ थाक्रे गाउँपालिका ११ स्थायी घर भई हाल कमल ६ बस्ने ३० वर्षीय राजन तामाङ पनि गम्भीर घाइते भएका थिए । उनको निम्स अस्पताल दमकमा उपचार भइरहेकोमा साँझ ७ः३० बजे डाक्टरले मृत घोषणा गरेका थिए । मृतकको शवलाई आवश्यक कानुनी प्रकृयाको लागि दमक अस्पताल दमकको शवगृहमा राखिएको छ । स्कुटी प्रहरी चौकी तोपगाछीको नियन्त्रणमा रहेको प्रहरीले जनाएको छ ।
