झापा । विद्यार्थीहरुलाइ अध्ययनसँगै उद्यमशील तर्फ लैजाने उद्देश्य राखेर झापामा नै पहिलो पटक २० जना विद्यार्थीहरुलाइ कफी बनाउने तालिम( वारिष्टा) सञ्चालन गरिएको छ । शिक्षा विकास तथा समन्वय इकाइ झापाको आयोजना तथा प्राविधिक शिक्षालयको सहयोगमा एकमहिने तालिम सञ्चालन गरिएको हो ।
तालिममा जिल्लाको मेचीनगरपालिका अन्र्तगत माध्यमिक तहका धुलाबारी ,कविशिरोमणि र काँकडभिट्टाका २० जना छात्रछात्रा सहभागि भएको शिक्षा विकास तथा समन्वय इकाइ झापाकी प्राविधिक सहायक कृष्टिना न्यौपानेले जानकारी दिइन् । विद्यार्थी उद्यमशील विकास कार्यक्रम अन्र्तगत सञ्चालन गरिएको तालिममा निरज श्रेष्ठले प्रशिक्षण दिएको उनले जनाइन् । तालिममा विद्यार्थीहरुले कफी वनाएर अतिथिहरुलाइ समेत वितरण गरेको उनले जनाइन् । सञ्चालित तालिमको मंगलबार समापन गरिएको उनले जानकारी दिइन् ।
विषेश गरी कक्षा ९ र १० का छात्रछात्रा सहभागि भएको धुलाबारी माध्यमिक विद्यालयका प्रधानाध्यापक महेन्द्र विलास लुईटेलले बताए । तालिमको समय अझै कम भएपनि विद्यार्थीले आधारभूत ज्ञान लिएको प्रतिकृया दिए । पढ्दै कमाउँदै गर्ने बाटो यो तालिमले देखाएको उनको भनाइ छ । विद्यालयबाट सहभागि विद्यार्थीले तालिम लिने अवसर पाएकोमा खुशी व्यक्त गरेको उनले विद्यार्थीलाइ उदृत गर्दै जानकारी दिए ।
