झापा । संखुवासभामा पहिरोमा परेर मंगलबार बिहान एकै परिवारका दुई जनाले ज्यान गुमाएका छन्।
ज्यान गुमाउनेमा सिसुवाखोलाका ५५ वर्षीया मोतीमाया राई र २७ वर्षीया समीक्षा राईको
मृत्यु भएको काेशी प्रदेश प्रहरीले जनाएकाे छ । घटनास्थलमै मृत्यु भएका उनीहरू सासूबुहारी भएकाे प्रहरीले जनाएकाे छ । सिलिचोङ गाउँपालिका–१ विलुवा दोभानमा
मंगलबार बिहान पहिरो खस्दा पुरिएर मृत्यु भएको हो।
जिल्ला सदरमुकाम चैनपुरबाट पाँच घण्टा पश्चिम उत्तर पैदल दुरीमा रहेको
घटनास्थलबाट सशस्त्र प्रहरीले एक जनाको हेलिकप्टरबाट उद्धार समेत गरेको छ।
मंगलबार बिहान करिब ५ बजेतिर घर माथिबाट पहिरोसँगै खसेको ठूलो ढुंगाले उनीहरूलाई किचेको थियो। ढुंगाले किचेर २७ वर्षीया छोरी रविना राई पनि गम्भीर घाइते भएकी छन्। उनलाई ९ घण्टापछि उपचारका लागि नेपाली सेनाको हेलिकप्टरमार्फत् सशस्त्र प्रहरी बल अस्पताल बलम्बु काठमाडौं लगिएको प्रहरीले जनाएको छ।
प्रहरीका अनुसार पहिरो खस्दा घरभित्र ६ जना थिए। तीमध्ये ३३ वर्षीय मनिकुमार राई, नाति १२ वर्षीय अमिर राई र नतिनी ४ वर्षीया समृद्धि राई भने सकुशल छन्। समीक्षाका पति विदेशमा रोजगारीमा छन्।
