भद्रपुर । भद्रपुर नगरपालिकाले आर्थिक वर्ष २०७९÷८० को वार्षीक नीति तथा कार्यक्रम अन्तर्गत नगरभित्र रहेका ३१ वटा सामुदायिक विद्यालयका विद्यार्थीलाई निःशुल्क विद्यालय पोसाक वितरण गर्ने अभियान शुरु गरेको छ ।
भद्रपुर नगरपालिका शिक्षा, युवा तथा खेलकुद शाखाको आयोजनमा मङ्गलबार भद्रपुर १ मा रहेको हिमाली माध्यमिक विद्यालयका कक्षा १ देखि ५ सम्म अध्ययनरत विद्यार्थीलाई एक ÷एकजोर विद्यालय पोसाक वितरण गरेर अभियान शुरु गरेको हो ।
सो विद्यालयमा १ सय ८१ जनाले निःशुल्क पोसाक पाएका छन् । छात्र छात्राले पोसाक पाएपछि खुसी देखिएका थिए भने अभिभावक समेत नगरले ल्याएको कार्यक्रममा उत्साहित देखिएका थिए । नगर भित्र विद्यालयमा अध्ययनरत १ देखि ५ कक्षा सम्मका २४ सय ५६ जना विद्यार्थीलाई निशुल्क पोसाक वितरण गरिने नगर शिक्षा शाखाका कर्मचारी योगेन्द्र पौडेलले बताए । नगरबाट पहिलो पटक ल्याएको कार्यक्रम नगर भित्रका सामुदायिक विद्यालयमा तीन हप्ता भित्र पोसाक उपलब्ध गराइसक्ने उनले जानकारी दिए ।
नगरले सुरुमा हाम्रो विद्यालयनै रोजेर यो कार्यक्रम गरेकोमा खुशी भएको हिमाली माविका प्रधानाध्यापक दीपक दाहाल बताउँछन् । नगरपालिकाले प्लेग्रुप देखि लिएर कक्षा १० सम्मका विद्यार्थीहरुलाइ पोसाक लगायत अन्य शैक्षिक सामग्री समेत व्यवस्थापनका लागि सुझाव दिएका थिए ।
नगरका प्रमुख प्रशासकीय अधिकृत टेक कुमार रेग्मीले विद्यार्थीहरुको हौसलाको निम्ति यो कार्यक्रम सुरु गरेको बताए । कार्यक्रमले सवै क्षेत्रमा टेवा पुर्याउने उनको बुझाइ छ ।
कार्यक्रममा बोल्दै नगर प्रमुख गणेश पोखरेलले पहिलो कार्यकालमा शिक्षामा १ करोड बजेट छुट्टयाइएको थियो भने चालु आर्थिक वर्षमा अनुमानित ३ करोड बजेट छुट्टयाइएको बताए । सामुदायिक विद्यालयलाइ गुणस्तर बनाउदै गुणस्तर मापन समिति मार्फत अनुगमन गरिने समेत उनले जानकारी दिए ।
