झापा / विराटनगर महानगरपालिका मेयर नागेस काेईरालाका कारण ३ महिनादेखि प्रमुख प्रशासकीय अधिकृतविहीन भएकाे छ ।
मेयर कोइरालाले आफूसँग सल्लाह नगरेर प्रमुख प्रशासकीय पठाएको भन्दै असन्तुष्टि जनाउदै हाजिर हुन नदिएपछि विराटनगर महानगरपालिका तीन महिनादेखि प्रमुख प्रशासकीय अधिकृतविहीन भएको छ । कार्यालय कायम मुकायम प्रमुख प्रशासकीय अधिकृतको भरमा चलिरहेको छ ।
विराटनगर महानगरका तत्कालीन प्रमुख प्रशासकीय अधिकृत राजेन्द्र पराजुलीले फागुनमा अवकाश पाएपछि रिक्त रहेको स्थानमा संघीय मामिला तथा सामान्य प्रशासन मन्त्रालयले सहसचिव रामचरित्र मेहतालाई पठाएको थियो । सहसचिवलाई राकेर महानगरले उपसचिव रामप्रसाद ढुंगेललाई कामु प्रमुख प्रशासकीय अधिकृतको जिम्मेवारी दिइएको छ । पराजुलीको अवकासपछि ढुंगेलले कामु जिम्मेवारी पाएका थिए ।
विराटनगर सरुवा भए पनि आउन नपाएका रामचरित्र मेहता युवा तथा खेलकुद मन्त्रालयमा छन् । जनप्रतिनिधिले अस्वीकार गरेपछि उनी नआउने भएका छन् । ‘म मन्त्रालयमै छु, बाहिर गएको छैन,’ सहसचिव मेहताले भने,‘ अब विराटनगर गइदैन होला ।’
मेहता यसअघि इटहरी उपमहानगरपालिकाको प्रमुख प्रशासकीय अधिकृत थिए । इटहरीमा रहदा उनी विवादमा तानिएका थिए । कर्मचारी सरुवाको विषयमा वडा कार्यालयको सर्भर डाउन गरेपछि उनी विवादमा तानिएका थिए ।
प्रमुख प्रशासकीय अधिकृतको सरुवा राकेर मेयर कोइराला भने इजरायल पुगेका छन् । कोइराला सोमबार इजरायल पुगेका हुन् । उनी असार ६ गते फर्कने कार्यसूची रहेको कोइरालाका प्रेस सल्लाहकार मिनकुमार श्रेष्ठले जानकारी दिए ।
विराटनगर महानगरपालिकाकी उपप्रमुख शिल्पा निराला कार्कीले प्रमुख प्रशासकीय अधिकृत नभएपनि काम गर्न गाह्रो नभएको बताइन् । नयाँ प्रमुख प्रशासकीय अधिकृत आउने विषयमा टुंगो नभएको उनले बताइन् ।
