धरापमा श्रमिकको जीवन र सरकारी उदासीनता

झापा / नेपालको अर्थतन्त्र र पूर्वाधार विकासको बलियो खम्बा मानिने निर्माण क्षेत्र आज श्रमिकहरूका लागि सबैभन्दा असुरक्षित र जोखिमपूर्ण बन्दै गइरहेको छ । गगनचुम्बी भवन, सडक र पुलहरू ठड्याउन दिनरात पसिना बगाउने मजदुरहरूको सुरक्षा अवस्था कति दयनीय छ भन्ने कुरा कार्यस्थलमा हुने दैनिक दुर्घटना र हताहतीले छर्लङ्ग पार्छ । हालै सार्वजनिक भएका विभिन्न तथ्याङ्कहरूले देखाउँछन् कि नेपालमा कृषि क्षेत्रपछि सबैभन्दा ठूलो अनौपचारिक श्रम शक्ति निर्माण क्षेत्रमा छ, जहाँ करिब २० लाख मजदुर आबद्ध छन् । विडम्बना, यीमध्ये ९६ प्रतिशतभन्दा बढी श्रमिकहरू असङ्गठित क्षेत्रमा कार्यरत छन्, जसको न त कुनै रोजगार सम्झौता हुन्छ, न त स्वास्थ्य र दुर्घटना बीमा नै ।

---