झापा । झापा सामुदायिक बचत तथा ऋण सहकारी संस्था लिमीटेड भद्रपुर ७ ले सञ्चालकहरुको क्षमता विकास तालिम सञ्चालन गरेको छ । संस्थाका अध्यक्ष हरीप्रसाद गौतमको सभापतित्व एवम बचत तथा ऋण सहकारी महासंघ(नेफ्स्कुन)का केन्द्रीय महासचिव घनश्याम अधिकारीको प्रमुख आतिथ्यमा तालिम सुरु गरिएको हो ।
संस्थाका उपाध्यक्ष भरत पोखरेलले औचित्यमाथि प्रकाश पारेको कार्यक्रममा सचिव मीनप्रसाद पोखरेलले सहजीकरण गरेका थिए ।
शुक्रबार सञ्चालन गरिएको पहिलो दिनको तालिम प्रमुख अतिथि एवम प्रशिक्षक घनश्याम अधिकारीले प्रशिक्षण दिएका थिए । पछिल्लो समय चौतर्फी रुपमा सहकारी संस्थामाथि विभिन्न तरिकाले कानुनी आक्रमण भइरहेको उनले उल्लेख गरे । सहकारीमाथि राष्ट्रको समेत ध्यान केन्द्रीत भइरहेको र सहकारीमा नयाँ कानुन लागूहुने तयारीमा रहेको उनले बताए । सहकारी आवश्यक र चुनौति दुवै देखा परेको हुँदा केही कानूनी जटिलताका विषयमा सरकारसँग समन्वय र छलफल भइरहेको समेत जानकारी गराए ।
संस्थाका सञ्चालक समिति र विभिन्न उपसमितिसहित कर्मचारी सहभागिता रहेको तालिममा सहभागिहरुले जिज्ञासा र सुझाव राखेका थिए ।
सहभागिलाइ दोस्रो दिन बचत तथा ऋण सहकारी महासंघ(नेफ्स्कुन)का कार्यक्रम अधिकृत सुमनराज घिमिरेले प्रशिक्षण दिने संस्थाका व्यवस्थापक आनन्द खतिवडाले जानकारी दिए । 
