फायल फाेटाे
झाप । नेपालमा राजनीतिक दलका नेताहरू राजसंस्था पुनर्स्थापना हुने हल्लाले त्रसित छन् ।
पूर्वराजा ज्ञानेन्द्र शाहलाई राजकाजमा फर्काउन राजावादीहरु सक्रिय
छन् । आज उनीहरुले राजधानीमा विशाल कार्यक्रम गर्दै छन् । पोखराबाट फर्किन
लागेका ज्ञानेन्द्रको स्वागत सम्मानमा उनीहरुले कार्यक्रम गर्न लागेका हुन्
। उनीहरूले गणतन्त्रवादी नेताहरुलाई चुनौती दिँदै राजालाई कुनै पनि हालतमा
नारायणहिटी दरबारमा ल्याउने दाबी गर्दै नारा–जुलुस कडा बनाउँदै गइरहेका
छन् ।
पूर्वराजा शाह फर्किने चर्चा पछिल्लो समय बढ्दै गइरहेको छ । सोही चर्चाका बीचमा नेताहरूले पूर्वराजालाई ‘चुनाव जितेर प्रधानमन्त्री’ बन्न सुझाव दिएका छन् । प्रधानमन्त्री केपी शर्मा ओलीदेखि पूर्वप्रधानमन्त्रीहरू शेरबहादुर देउवा, माधवकुमार नेपाल, पुष्पकमल दाहाल ‘प्रचण्ड’, झलनाथ खनाल, डा. बाबुराम भट्टराईसहितले पूर्वराजालाई चुनाव जितेर प्रधानमन्त्री भई जनताको सेवा गर्न चुनौती दिएका छन् । गणतन्त्रका लागि जेलजीवन बिताएका र आन्दोलन गरेर सत्तामा पुगेका यी नेताहरूले कुनै पनि हालतमा राजतन्त्र फर्किने सम्भावना नभएको दाबी गरेका छन् ।
राजतन्त्रको वकालत गर्दै आएको र राजालाई फर्काउने अभियानमा लागेको राष्ट्रिय प्रजातन्त्र पार्टी (राप्रपा) नागरिककै सहयोगमा राजालाई नारायणहिटी दरबार पुर्याउने रणनीतिमा छ । गत बुधबार काठमाडौंमा राप्रपाले मोटरसाइकल र्याली आयोजना गरेको थियो । जहाँ राजाको पक्षमा नारा लागेको थियो । यस्तै, पोखरामा गत बिहीबार दिवंगत राजा वीरेन्द्रको सालिक अनावरण पूर्वराजा ज्ञानेन्द्रले गरेका थिए । त्यहाँ पनि राजा र राजसंस्थाको पक्षमा नाराबाजी भएको थियो । पछिल्लो समयमा देशका विभिन्न ठाउँमा राजसंस्था र राजाको पक्षमा प्रदर्शन भइरहेको छ ।
