झापा । गोरखाको साम्दोमा सशस्त्र प्रहरी बलले बोर्डर आउट पोस्ट (बीओपी) स्थापना गरेको छ । नेपाल चीनको सीमातर्फ चुमनुब्री गाउँपालिका-१ साम्दोमा आइतबार बीओपी स्थापना गरिएको हो ।
योसँगै चीनतर्फको बीओपीको संख्या १० पुगेको छ । सशस्त्र प्रहरी बल नेपाल नंं. २० गुल्म गोरखाको मातहत रहने गरी बीओपी स्थापना भएको सशस्त्रका सह-प्रवक्ता तथा डीएसपी शैलेन्द्र थापाले बताए । बीओपी जिल्ला सदरमुकामबाट १६४ किलोमिटर उत्तरतर्फ छ ।
नेपाल र चीन सीमा इलाकामा स्थापना गरिएको बीओपीले विपद्जन्य घटनाहरू हिमपात, हिमपहिरोमा परेका नागरिकहरुको उद्धार, अवैध चोरी निकासी पैठारी नियन्त्रण, सीमावर्ती क्षेत्रमा हुने अपराधिक तथा अवान्छित क्रियाकलाप न्यूनीकरण गर्न सहयोग पुग्ने सशस्त्रले जनाएको छ ।
समुन्द्री सतहतबाट करिब ३ हजार ८७५ मिटरको उचाइ स्थापना भएको बीओपीबाट करिब १५ किलोमिटर नजिक चीनसँगको सीमाना रुइला नाका रहेको छ ।
यसअघि सशस्त्रले चीनतर्फ दार्चुलाको तिंकर, हुम्लाको हिल्सा, मुस्ताङको नेचुङ्ग, रसुवाको टिमुरे, सिन्धुपाल्चोकको तातोपानी र गुम्बा, दोलाखाको लामाबगर, संखुवासभाको किमाथाङ्का, ताप्लेजुङ्गको ओलाङचुङगोलासहित ९ ठाउँमा बिओपी स्थापना गरिसकेको छ ।
हाल भारततर्फ २४४ र चीनतर्फ १० गरी बिओपीको संख्या २५४ वटा पुगेको छ ।
