भद्रपुरस्थित मेची पुलबाट “टुर दि मेची–महाकाली २०८२” साइकल यात्रा सुरु भएको छ । विश्व स्वतन्त्रता दिवसको अवसरमा भद्रपुर साइकल समाजले आज बिहान एक संक्षिप्त कार्यक्रमको आयोजना गरी भद्रपुर–५ मेची पुलबाट साइकल यात्राको शुभारम्भ गरेको हो ।
यात्रामा पाँच जना साहसी साइकल यात्रीहरू जीवनकुमार श्रेष्ठ, मनोज सिंह, देवीबहादुर श्रेष्ठ, समीर पोखरेल र विश्वचन्द्र महतोले पूर्वी सिमाना मेचीदेखि पश्चिमी सिमाना महाकालीसम्म प्याडलमार्फत यात्रा गर्नेछन्।
कार्यक्रमको उद्देश्य भद्रपुरका पर्यटन स्थलहरूको प्रवर्द्धन, साइकल संस्कृतिको विकास, र स्वस्थ जीवनशैली तथा वातावरण संरक्षणप्रति जनचेतना जगाउने रहेको साइकल समाजका अध्यक्ष जीवनकुमार श्रेष्ठले जानकारी दिए । उनका अनुसार यात्राको मार्ग मुख्य रूपमा पूर्व पश्चिम राजमार्ग हुनेछ ।
दैनिक करिब १५० किलोमिटर दूरी तय गरिनेछ। सबैको साथ र समर्थनबाट यो ऐतिहासिक “टुर दि मेची–महाकाली २०८२” सफल बन्ने विश्वास आफूले लिएको उनको भनाई छ । साइकल समाजले यात्राको सुरक्षित सञ्चालनका लागि देशभरका सुरक्षा निकाय, प्रशासन, ट्राफिक कार्यालय, नेपाली सेना र सञ्चारकर्मीहरूसँग सहयोग र सद्भावका लागि अनुरोधसमेत गरेको छ।
