झापा । झापाका ७६ प्रतिशतले स्वास्थ्य बिमा गराएकाे पाइएकाे छ ।
जिल्लाका १५ वटै पालिकामा स्वास्थ्य बिमा लागू भएपछि याे तथ्याङ्क पुगेकाे हाे ।
झापा गाउँपालिकासंग भदौ १ गते स्वास्थ्य बिमा लागू गर्ने संझौता भएपछि यस्ताे तथ्याङ्क देखा परेकाे हाे । यसअघि जिल्लाका १४ वटा पालिकामा स्वास्थ्य बिमा लागू भएर झापा गाउँपालिकामा बिमा कार्यक्रम संचालन भएको थिएन । झापा गाउँपालिकाले संझौता गरेसंगै जिल्लाभरि नै स्वास्थ्य बिमा लागू भएको बिमा बोर्ड झापा शाखाकी प्रमुख लक्ष्मी कँडेलले बताइन् ।
२०७४ सालमा पहिलो पटक भद्रपुर नगरपालिकाकले स्वास्थ्य बिमा लागू गरेको थियो । त्यसपछि अन्य पालिकाहरुले बिमा कार्यक्रम संचालन गरेका थिए । झापाका ७६ प्रतिशत नागरिकले स्वास्थ्य बिमा गरेको कार्यालय प्रमुख कँडेलले बताइन् । ७ लाख ५६ हजार २४ जनाले शुल्क तिरेर स्वास्थ्य बिमा गरेका छन् भने ५० हजार ४७६ जना ज्येष्ठ नागरिकको निःशुल्क स्वास्थ्य बिमा गरिएको छ ।
२०७८ को जनगणना अनुसार झापाको जनसंख्या ९ लाख ९८ हजार ५४ रहेको छ ।
स्वास्थ्य बिमा गराउनका लागि जिल्लाका १३१ वटा वडामा १७८ जना दर्ता सहयोगी
रहेकाे कार्यालयले जनाएकाे छ ।
