झापा / झापाको कमल गाउँपालिकामा सर्पको टोकाइबाट एक महिलाको मृत्यु भएको छ ।
इलाका प्रहरी कार्यालय दमकका अनुसार कमल गाउँपालिका वडा नम्बर ३ बस्ने ४० वर्षीया सरस्वती मगर लिम्बुको सर्पदंशका कारण मृत्यु भएको हो ।
मंगलबार (हिजो) बेलुका अन्दाजी ७:५० बजेको समयमा आफ्नै घरको भान्सा कोठामा खाना पकाउने क्रममा उनलाई विषालु कोब्रा सर्पले टोकेको थियो ।
सर्पले टोकेलगत्तै उनलाई उपचारका लागि नेपाल रेडक्रस सोसाइटीद्वारा सञ्चालित दमक सर्पदंश उपचार केन्द्रमा ल्याइएको थियो । सो सम्बन्धी खबर राती १०:२५ बजे इलाका प्रहरी कार्यालय दमकमा प्राप्त हुनासाथ प्रहरी नायब निरीक्षक (प्रसनि) को कमाण्डमा प्रहरी टोली घटनास्थल तथा अस्पताल पुगेको थियो ।
अस्पतालमा उपचार भइरहेकै क्रममा राती १०:४० बजे चिकित्सकले उनलाई मृत घोषणा गरेका थिए । मृतक ज्ञान बहादुर लिम्बुकी श्रीमती हुन् । वर्षायाम सुरु भएसँगै झापाका विभिन्न क्षेत्रमा सर्पको जोखिम बढेकाले सचेत रहन र रातीको समयमा भुइँमा जथाभाबी नहिँड्न प्रहरीले आग्रह गरेको छ ।
