साना । यमनको राजधानी सानामा शनिबार हमासको समर्थनमा विशाल प्रदर्शन भएको छ । राजधानी सानासहित यमनको अधिकांश भूभाग इरान समर्थित हुथी विद्रोहीको नियन्त्रणमा छ । जसले हमासलाई समर्थन गर्ने घोषणा गरेका छन्।हुथी विद्रोहीले लाल सागर हुँदै जाने मालवाहक जहाजमा ड्रोन र रकेटले आक्रमण गरिरहेका छन् । उनीहरूले इजरायल जान लागेका जहाजहरूलाई आक्रमण गरिरहेको बताएका छन्। यसपछि जहाजबाट सामान ओसारपसार गर्ने विश्वका धेरै ठुला कम्पनीहरूले लाल सागर पार नगर्ने घोषणा गरेका छन् । यसैबिच अमेरिकाले जहाज बचाउन नौसेना अभियान सुरु गरेको छ ।
इजरायल र हमास बिचको युद्ध अक्टोबर ७ पछि सुरु भएको थियो जब हमासले इजरायलमा आक्रमण गर्यो । उक्त आक्रमणमा १२ सयभन्दा बढी इजरायली मारिएका थिए । त्यसपछि इजरायलले गाजामा गरेको आक्रमणमा हालसम्म २० हजारभन्दा बढी मानिस मारिएको हमासको दाबी छ ।
