झापा । जनताको तटबन्ध कार्यक्रमअन्तर्गत झापाका विभिन्न नदी किनारमा दुई
वर्षमा एक सय २० किलोमिटर बाँध निर्माण भएको छ । बाँध निर्माणपछि हजारौँ
बिघा खेतीयोग्य जग्गा र मानव बस्ती बाढीबाट जोगिएको छ ।
आर्थिक वर्ष २०७९/८० र २०८०/८१ मा उक्त तटबन्ध निर्माण भएको हो । बाँध
निर्माणमा रु तीन अर्ब ८९ करोड ३५ लाख खर्च भएको तटबन्ध निर्माण आयोजना
कार्यालयका सूचना अधिकारी महेश खत्रीले बताए ।
जिल्लामा छ वटा नदीमा तटबन्ध निर्माण भइरहेका छन् । कार्यालयले मेची,
निन्दा, बिरिङ, कनकाई, रतुवा र मावा नदीको बाढी र जमिन कटान रोक्न विसं
२०७४ मा विस्तृत परियोजना प्रतिवेदन बनाएर तटबन्ध निर्माण आयोजना अघि
बढाएको थियो ।
आव २०७९/८० मा एक सय १७ किमी र आव २०८०/८१ मा तीन किमी बाँध निर्माण
भएको छ । पछिल्लो वर्ष सरकारले तटबन्धका लागि विनियोजन गरेको बजेट पर्याप्त
नभएको आयोजनाले जनाएको छ ।
विगत दुई वर्षमा मेची नदीमा १० दशमलव ५३ किमी, बिरिङमा २७ दशमलव ८५
किमी, कनकाइमा २७ दशमलव ९८ किमी, कमलमा १४ दशमलव ९८ किमी र रतुवा–मावामा ३८
दशमलव ६१ किमी बाँध निर्माण भएको खत्रीले जानकारी दिए ।
जिल्लाका प्रमुख पाँच नदीमा तीन सय चार किमी लामो तटबन्ध निर्माण
गर्ने आयोजनाको लक्ष्य छ । दुई वर्षमा लक्ष्यको तुलनामा ३९ दशमलव पाँच
प्रतिशत मात्र भौतिक प्रगति भएको पाइएको छ ।
लक्ष्यअनुरूप तटबन्ध निर्माण गर्न रु १७ अर्ब ६१ करोड सात लाख ५२ हजार
बजेट आवश्यक पर्छ । आव २०८०/०८१ मा रु छ करोड ६५ लाख विनियोजन भएको थियो ।
तटबन्ध निर्माण १९ ठाउँमा भइरहेको छ । सबैभन्दा बढी रतुवा–मावा नदीको छ
स्थानमा बाँध निर्माण भइरहेको छ । कमल नदीमा चार, कनकाइमा चार, विरिङमा तीन
र मेचीमा दुई ठाउँ तटबन्ध निर्माण भइरहेको आयोजनाले जनाएको छ ।
