झापा / बहुचर्चित प्रकरणमा मुछिएका पूर्व गृहमन्त्री रमेश लेखकको बयान सकिएकाे छ भने पूर्व प्रधानमन्त्री केपी शर्मा ओलीको बयान भने अस्पतालमै सुरु गरिएको छ।
भदौ २३ र २४ मा भएको जेनजी आन्दोलन दमन गरेको कसुरमा पक्राउ परेका ओलीसँग अनुसन्धान अधिकृत र सरकारी वकिलले अस्पतालमा उनीसँग बयान लिन शुरु गरेका हुन् ।
चिकित्सकरुले अस्पताल बाहिर लैजान नमिल्ने राय दिएपछि ओलीसँग अस्पतालमा नै बयान लिन थालिएको जिल्ला प्रहरी परिसर काठमाडौंका एसपी पवन भट्टराईले जानकारी दिए । प्रहरी स्रोतका अनुसार स्वास्थ्य समस्याका कारण ओलीलाई अस्पतालमा नै राखेर बयान लिने व्यवस्था मिलाइएको हो। चिकित्सकको निगरानीमा उनको बयान प्रक्रिया अघि बढाइएको जनाइएको छ। यसअघि उनलाई अदालत उपस्थित गराउने तयारी भए पनि स्वास्थ्य अवस्थालाई मध्यनजर गर्दै सो निर्णय परिवर्तन गरिएको हो।
यता, लेखकले भने आफ्नो बयान सकाएका छन्। उनले अनुसन्धानमा आवश्यक सबै विवरण दिएको प्रहरीको दाबी छ। अब अनुसन्धान टोलीले दुवैको बयानका आधारमा थप प्रमाण संकलन तथा कानुनी प्रक्रिया अगाडि बढाउने तयारी गरेको छ।
यस घटनाले राजनीतिक वृत्तमा तरंग ल्याएको छ। विपक्षी दलहरूले घटनाको निष्पक्ष छानबिनको माग गरेका छन् भने समर्थकहरू भने पक्राउ र अनुसन्धान प्रक्रियामाथि प्रश्न उठाउदै तत्काल रिहाइकाे माग गरेका छन्।
प्रहरीले भने कानुन अनुसार निष्पक्ष रूपमा अनुसन्धान भइरहेको स्पष्ट पारेको छ।
