झापा । इलामको रोङ गाउँपालिकामा गिद्धको शालिक निर्माण गरिएको छ ।
सोह्रौ अन्तर्राष्ट्रिय गिद्ध संरक्षण तथा सचेतना दिवसको अवसर पारेर
करसोङ पदमार्गमा गाउँपालिका अध्यक्ष मनिकुमार स्याङबो र उपाध्यक्ष
विष्णुमाया खवासले गिद्धको शालिक अनावरण गरेका छन् । शालिक निर्माणको लागि
युएनडीपीले समेत लगानी गरेको थियो । फाइबरको शालिक निर्माण गर्न १ लाख ६०
हजार रुपैयाँ खर्च भएको निर्माण समितिका अध्यक्ष प्रकाश राईले जानकारी दिए ।
उनका अनुसार शालिक राख्नका लागि मुडा बनाउन करिब १ लाख रुपैयाँ खर्च
भएको थियो । शालिक मेची राजमार्गबाट करिब १ किलोमिटर ४ सय मिटर दूरीमा
निर्माण गरिएको छ । विशेषगरी गिद्धको पुरानो बासस्थान भएको क्षेत्र भएकाले
पहिचानको रुपमा स्थापित गराउन शालिक निर्माण गरिएको निर्माण समितिका
अध्यक्ष राईले जानकारी दिए ।
करसोङ पदमार्गमा पर्ने सलकपुर, जिर्मलेलगायतका क्षेत्रमा गिद्धको बासस्थान समेत रहेको छ । दुई दशक अघिसम्म खोला र वन क्षेत्रमा गिद्धका बथान प्रशस्त पाइने गरेको थियो । अहिले चुरे क्षेत्रमा केही गिद्ध मात्र भेटिएका छन् । बासस्थानका रुपमा तराईमा रहेका अग्ला सिमलका रुख मासिँदा र आहाराको रुपमा रहेका मरेका पशुमा किटनाशक विषादी मिसिएका कारण गिद्धको अस्तित्व सङ्कटमा परेको छ ।
गिद्ध संरक्षणको सन्देश दिनका लागि शालिक निर्माण गरिएको गाउँपालिका अध्यक्ष स्याङबोले जानकारी दिए ।
