झापा / सरकारले अधिवक्ता डा. नारायणदत्त कँडेललाई नेपालको महान्यायाधिवक्तामा नियुक्त गरेको छ। आइतबार बसेको मन्त्रिपरिषद् बैठकले उनलाई उक्त पदमा नियुक्त गर्ने निर्णय गरेको हो।
प्रधानमन्त्रीको सिफारिसमा राष्ट्रपति रामचन्द्र पौडेलले संविधानको धारा १५७ (२) बमोजिम कँडेललाई महान्यायाधिवक्तामा नियुक्त गरेका हुन्।
यसअघि महान्यायाधिवक्ताको जिम्मेवारी सम्हाल्दै आएकी सविता बराल भण्डारीले राजीनामा दिएपछि उक्त पद रिक्त भएको थियो। सोही रिक्त पदमा कँडेललाई नियुक्त गरिएको हो।
महान्यायाधिवक्ता सरकारको मुख्य कानुनी सल्लाहकार हुने संवैधानिक पद हो। यस पदधारीले सरकारका तर्फबाट फौजदारी मुद्दाको अभियोजन गर्ने, सरकारी वकिलहरूको नेतृत्व गर्ने तथा सरकारवादी मुद्दामा बहस–पैरवी गर्ने जिम्मेवारी वहन गर्छन्।
डा. कँडेल यसअघि विभिन्न चर्चित मुद्दामा कानुन व्यवसायीको रूपमा सक्रिय रहेका थिए, जसमा रास्वपा सभापति रवि लामिछानेसँग सम्बन्धित मुद्दामा पनि उनले कानुनी सल्लाहकारको भूमिका निर्वाह गरेका थिए।
नवनियुक्त महान्यायाधिवक्ता कँडेलले चाँडै पद तथा गोपनीयताको शपथ लिने कार्यक्रम रहेको जनाइएको छ।
