झापा / झापाको बाह्रदशी गाउँपालिका–५ स्थित गाउँपालिकाको ३ तले भवनबाट लडेर एकजना कामदार गम्भीर घाइते भएका छन्।
मङ्गलवार बिहान अन्दाजी ९:४० बजेको समयमा मोरङकाे सुन्दरहरैँचा नगरपालिका–४ का ४२ वर्षीय टंक थापा भवनमा रंग लगाउने काम गर्दै गर्दा तेस्रो तलाबाट चिप्लिएर तल झरेर घाइते भएका थिए। लड्ने क्रममा उनी भवनको ग्रिलमा अड्किएका थिए।
दुर्घटनामा थापाको निधार र दाहिने तिघ्रामा गम्भीर चोट लागेको छ। गम्भीर अवस्थामा रहेका उनलाई स्थानीयले तुरुन्तै उद्धार गरी उपचारका लागि बि एण्ड सि अस्पताल बिर्तामोड पठाएको जिल्ला प्रहरी कार्यालय झापाले जनाएको छ।
घटनापछि उद्धार र उपचारमा बाह्रदशी गाउँपालिकाका कर्मचारीहरू समेत संलग्न भएका थिए।
घटनाको थप अनुसन्धान भइरहेको प्रहरीले जनाएको छ।
