झापा । झापाको गौरीगञ्जस्थित छोटी भन्सार कार्यालय आठमौजा संचालन हुने भएको छ ।
कोरोना कालदेखि बन्द रहेको छोटी भन्सार कार्यालयलाई यसै साता संचालनमा ल्याउने तयारी थालिएको हो । मेची भन्सार कार्यालयका प्रमुख राजेन्द्रप्रसाद चुडालले छोटी भन्सार कार्यालय यसै सातादेखि संचालन गर्ने बताए । उनले केही पूर्वाधारको काम गर्नुपर्ने भएकाले त्यसलाई पूरा गरी संचालनमा ल्याउने जानकारी दिए । झापाको बासिन्दा भएकाले आफ्नो कार्यकालमै छोटी भन्सार आठमौजालाई संचालन गरेरै छाड्ने उनले बताए ।
यही माघ १३ गते भन्सार दिवस रहेको छ । भन्सार दिवसको अवसर पारेर छोटी भन्सार कार्यालयलाई संचालन गर्ने योजना रहेको मेची भन्सार कार्यालयका सूचना अधिकारी गणपति कँडेलले बताए । मेची भन्सार कार्यालयअन्तर्गत ७ वटा छोटी भन्सार रहेका छन् । कतिपय छोटी भन्सारको नामोनिशान नै छैन ।
भारतको विहार तथा बंगाल राज्यसँग जोडिएको झापा जिल्लामा काँकडभिट्टा र
भद्रपुर गरी दुई वटा मुख्य नाका छन् । दुवै नाकामा मूल भन्सार रहेका छन् ।
जिल्लाका अन्य नाकाहरूमा छोटी भन्सार कार्यालयहरू रहेका थिए । तर,
काँकडभिट्टा र भद्रपुर नाकाबाहेक अन्य भन्सारहरु लामो समयदेखि कोरोना
महामारीका कारण बन्द छन् ।
बिहारको फत्तेपुर नाकासँग जोडिएको छोटी भन्सार आठमौजा संचालन हुँदा माई पश्चिमका बासिन्दालाई सहज हुने भएको छ । छोटी भन्सार बन्द भएपछि सीमाबाट अवैध आयातनिर्यात हुने क्रम बढ्दै गएको छ ।
