झापा । झापाको भद्रपुरमा सामूहिक रुपमा धान रोपेर २१ औं धान दिवस तथा
रोपाइँ महोत्सव गरिएको छ ।जलवायुमैत्री कृषि,धान उत्पादनमा वृद्दि भन्ने मूल नाराकासाथ भद्रपुर नगरपालिकाका कृषि शाखाकाे आर्थिक सहयोगमा साना किसान कृषि
सहकारी संस्था भद्रपुर १० ले शनिबार बिहान भद्रपुर–७ मा आयोजना गरेको कार्यक्रमका बिच
दिवस मनाइएको हो । त्यहाँ झन्डै १० कट्ठा जग्गामा रोपाइँ गरिएको थियो । सहकारी संस्थाले गाेपाल दाहालकाे जग्गा भाडामा लिएर खेति गरेकाे थियाे । 
संस्थाका अध्यक्ष देवीमाया अधिकारीको अध्यक्षतामा आयोजित कार्यक्रमका प्रमुख अतिथि भद्रपुर नगरप्रमुख गणेश पाेखरेल,वडाअध्यक्षहरू ,सदस्यहरू ,राजनीतिक दल ,विभिन्न संघसंस्था ,नगरपालिका कर्मचारी लगायतले धान रोपेका थिए ।
सो अवसरमा जनप्रतिनिधि ,स्थानीय र बालबालिकाकाे छुट्टाछुट्टै हिले दौड प्रतियोगिता पनि गरिएको थियो । कार्यक्रमका बिच सहभागीहरूलाई असार १५ को सगुन स्वरुप दही–चिउरा खुवाइएको थियाे ।
