झापा । कालोपत्रे सडक निर्माणको माग राख्दै स्थानीयले सडक अवरुद्ध पारेको विषयलाइ लिएर सोमबार भएको छलफलमा सडक निर्माणमा सवै एकजुट हुने भएका छन् ।
विर्तामोड – भद्रपुर सडक खण्ड अन्र्तगत देउनिया खोला देखि चन्द्रगढी भैरब चोकसम्मको सडक प्रक्रिया अघि बढाउन सरोकारवालासहित स्थानीय जनप्रतिनिधि सहमत भएका हुन् ।
भद्रपुर १० नम्बर वडा कार्यालयमा साेमबार भएकाे छलफलमा भद्रपुरका मेयर गणेश पोखरेलले सडकका विषयमा जानकारी गराएका थिए । छलफलमा उपस्थित सरोकारवालाहरुले जनप्रतिनिधिमाथि गुनासा र सुझाव राखेका थिए ।
बृहत छलफलपछि सरोकारवालामध्येबाट सञ्जय श्रेष्ठ, टिका काम्वाङ, रविन कार्की, सन्दिप सोनार, लोकेन्द्र बहादुर श्रेष्ठ ,निग्मानन्द शाह(शंकर) र उत्तम तुलाधर रहनेगरी सात सदस्यीय सहजीकरण समिति चयन गरेको छ । यसैगरी सडक निर्माणमा सहयोग पुर्याउने, तत्काल सडकमा धुलो रोमथाम लगायतका उपाय अपनाउने, मुआब्जाका लागि सम्बन्धित निकायमा पहल गर्ने , सरोकारवाला, प्रमुख जिल्ला अधिकारी, सडक डिभिजन प्रमुख, नगरपालिका लगायत तत्काल वैठकवसी समस्या समाधान गर्ने निर्णय गरिएको नगर प्रमुख पोखरेलले जानकारी दिए । समस्यालाइ बुँद्दागत रुपमा लिएर केन्द्रमा पठाउने उनले बताए । सडक जसरी पनि निर्माण गरिने उनले दाबी गरे ।
ठेकेदारले सडक निर्माणमा वेवास्ता गरेको भन्दै स्थानीयले आइतबार लेखनाथ चोकको सडक अवरुद्ध पारेका थिए ।
सडक बन्द गराएपछि भद्रपुर नगरका मेयर पोखरेलसहित जनप्रतिनिधिले छलफलका लागि अनुरोध गरेपछि सडक खुला गरिएको थियो ।
