झापा । झापा सामुदायिक बचत तथा ऋण सहकारी संस्था लिमीटेड भद्रपुर–७ चन्द्रगढीको १७ औं वार्षिक साधारण सभा सम्पन्न भएको छ । समितिका अध्यक्ष हरिप्रसाद गौतमको सभापतित्व तथा झापा जिल्ला सहकारी सङ्घका अध्यक्ष गणेश ढकालको प्रमुख आतिथ्यमा शनिबार चन्द्रगढीमा सम्पन्न भएको हो ।
अध्यक्ष गौतमले संस्थाको वार्षिक प्रतिवेदन प्रस्तुत् गरेका थिए । संस्थाले गत आर्थिक वर्ष २०७९। ८० मा १ करोड २ लाख ४९ हजार ४ सय ६५ रुपैयाँ ८४ पैसा आम्दानी गरी २२ लाख ८७ हजार १ सय ८१ रुपैयाँ २६पैसा बचत गरेको जनाएको छ । त्यसैगरी चालु आर्थिक वर्ष २०८० । ८१ का लागि १ करोड ७८ लाख १० हजार आम्दानीको लक्ष्य लिएको प्रतिवेदनमा उल्लेख गरिएको छ ।
कार्यक्रममा उत्कृष्ट बचत, ऋणी, अनिवार्य बचत र एक वर्षे आवधिक बचत कर्ता पुरस्कारमा क्रमश पुरुषोत्तम पोखरेल, मेरी चौधरी, हिमादेवी कुईकेल धमला र गोमा पौड्याल घिमिरेलाइ सम्मानसिहत पुरस्कृत गरिएको थियो । त्यसैगरी वर्ष ८३ की हरि कुमारी पोखरेल र ८१ वर्षका विष्णुप्रसाद सिवाकोटीलाई जेष्ठ सदस्य सम्मानबाट सम्मानित गरिएको थियो भने कक्षा १२ मा उत्कृष्ट अङ्क ल्याउने विकल्प कोइराला , सुष्मिता कुमारी चौधरीलाइ नगदसहित शेयर सदस्य सन्तती पुरस्कार प्रदान गरिएको थियो ।
समितिका उपाध्यक्ष भरत पोखरेलले स्वागत गरेको कार्यक्रममा राष्ट्रसेवक सहकारीका अध्यक्ष वशिष्ठ अधिकारी र प्रादेशिक बचत तथा ऋण सहकारीका अध्यक्ष घनश्याम अधिकारीले मन्तव्य राखेका थिए । कार्यक्रमको सञ्चालन समितिका सह–सचिव मिनप्रसाद पोखरेलले गरेका थिए ।
यता संस्थामा रिक्त रहेको सचिव पदमा वर्तमान सह–सचिव पोखरेललाइ ,सदस्य ससिम पोखरेललाइ सह–सचिवमा,बजार व्यवस्थापन तथा सदस्यता विस्तार उपसमिति संयोजक ज्वालाप्रसाद निरौलालाइ सदस्य पदमा र निरौलाको पदमा विमला गौतम भट्टराइलाइ बन्द शत्रले सर्वसम्मत चयन गरि पूर्णता दिएको गठित उप निर्वाचन समितिका संयोजक विवेक पोखरेलले जानकारी दिए । संस्थामा हाल १३ सय ३३ महिलासहित २४ सय ५२ शेयर सदस्य रहेका छन् ।
संस्थाले ७ वटा एकाईमा विभाजन गरी असोज ६ बाट १२ गतेसम्म एकाई गत साधारण सभा सम्पन्न गरी एकाईबाट छनोट भएका शेयर सदस्यबाट मूल साधारण सभा सम्पन्न गरेको संस्थाका व्यवस्थापक आनन्द खतिवडाले जानकारी दिए ।
